ILOILO CITY- Magabalik sa Brgy. Sto. Niño Sur, Arevalo, Iloilo City ang mga katapo sang Bureau of Fire Protection- Region 6 agud magpatigayon sang regular coastal clean- up kada semana.
Ini kasunod sang pagpaninlo sang katapo sang ahensya sa nasambit nga lugar bilang kabahin sang community service nga kinahanglan i-comply ni Fire Senior Supt. Jerry Candido, director sang Bureau of Fire Protection Region 6.
Una na nga ginmando ni Mayor Jerry Treñas ang pagpatigayon sang community service bangud sa pagviolate ni Candido sa COVID-19 protocol bangud sa pagpatigayon sang mass gathering sa inagurasyon sang BFP substation sa Alta Tierra Village, Jaro kon sa diin nagtambong man si Iloilo City Lone District Rep. Julienne Jamjam Baronda nga gindagdagan man sang kaangay nga penalidad.
Sa interview sang Bombo Radyo kay Candido, iya ginpahayag nga magapadala siya sang lima ka personnel sang ahensya agud magpadayon sang coastal clean-up sa Brgy. Sto. Niño Sur, Arevalo, Iloilo City.
Suno sa regional director, himuo nila ini kada semana.
Nahibaluan nga magluwas sa coastal clean-up, nagpatigayon man ang ahensya sang mangrove planting sa Hinactacan, La Paz, Iloilo City, kag community pantry sa Iloilo Freedom Grandstand bilang kabahin sang pagrender nila sang community service.
