ILOILO CITY – Gina-usisa sang COVID-19 team sang Iloilo City Government kag sang Jaro Police Station kun sin-o ang naghaboy ang ginabanta masobra 100 ka rapid test kits sa kilid sang dalan sa Barangay San Vicente, Jaro, Iloilo City.
Sa interview sang Bombo Radyo kay Mr. Jeck Conlu, spokesperson sang COVID-19 team, iya ginpahayag nga naga-secure kag naga-review na sila subong sang closed-circuit television (CCTV) footage malapit sa area.
Dapat suno kay Conlu nga may yara gid sang proper handling and disposal ang kaangay sini nga infectious waste bangud daku ang posibilidad nga kontaminado ini sang COVID-19.
Posible suno kay Conlu may yara sang basurero nga nagkolekta sang basura halin sa isa ka daku kag pribado nga establisyemento kag sang nakit-an nga indi naman mapuslan ang amo nga test kits, ginhal-id nalang sa dalanon.
Posible man suno kay Conlu nga may yara sang mass testing nga ginpatigayon ang ospital ukon ang establisemento.
Paathag sang natungdan, dapat nga nagapakig-angot gid sa city government kun ginakolekta ang ini nga infectious waste bangud may yara sang team halin sa General Services Office (GSO) nga nagatutok diri.
May ginasundan naman ang Jaro Police Station nga persona nga amo ang ginatudlo naghal-id sang masobra 100 ka rapid test kits.
Sa interview sang Bombo Radyo kay Police Captain Eduardo Siacon, Jr., hepe sang Jaro Police Station, iya ginpahayag nga ‘las 6:30 sang gab-i sang Hulyo 7 ginpanghaboy ang nasambit nga infectious waste.
Ginapahayag nagasakay sa pedicab ang naghaboy sang test kits kag padulong sa Lapaz area.
May na-secure ang mga pulis nga footages sang CCTV apang ginapahayag nga buron gani nga indi man makit-an ang nawong sang naghal-id.
Nagpasalig ang pulis nga padayon ang pagtrace sa amo nga persona kag nagapangita pa sang dugang nga footages nga makadugang sa ginapatigayon nga imbestigasyon.
