May yara sang national kag local vaccination plan nga ginasunod para sa allocation sang COVID-19 vaccines sa nanuhay-tuhay nga local government unit sa pungsod.
Sa interview sang Bombo Radyo kay Iloilo Governor Arthur Defensor Jr., iya ginpahayag nga isa sa mga ginalantaw sang national government sa pagpanagtag sang bakuna, amo ang rate sang kaso sang virus, populasyon kag ekonomiya sang isa ka lugar.
Nagapati si Defensor nga patas man ang national government sa pagpanagtag sang mga bakuna bangud may ginasunod nga mga tikang ang gobyerno.
Kaangay na lamang suno sa gobernador sa National Capital Region nga una na nangin priority sang gobyerno sa COVID-19 vaccine allocation.
Ini bangud isa ang nasambit nga lugar sa may pinakadamo nga populasyon sa pungsod, may pinakadamo nga kaso sang COVID-19 kag yara na sa alang-alang ang ekonomiya.
Nagakadapat lamang suno sa gobernador nga kun may yara sang problema kag kakulang sa bakuna, himuon na lamang sang iban nga local government unit ang tanan nga masarangan agud mapalab-ot ini sa national government.
Matandaan nga napun-an sang kontroberiya ang paghangkat ni Iloilo First District Representative Dr. Janette Garin, anay tiglikom sang Department of Health (DOH), kay vaccine czar Secretary Carlito Galvez Jr. nga pamatud-an nga indi binutig kag wala sang lamod-pamulitika ang iya mga pahayag nga naghingyo ang mamalidha sang COVID-19 vaccines agud dal-on sa iya opisina kag ipain para sa iya nasakpan nga mga lugar sa probinsya sang Iloilo.
Suno kay Defensor, kun matuod ang alegasyon ni Galvez nga nagapangayo ang mamalidha sang COVID-19 vaccines para dal-on sa iya opisina, nagakadapat nga ang mga bakuna nga ihatag kay Garin ang i-allot para sa bilog nga Iloilo Province.
