Ginaduso sang Committee on Health sa Konseho ang pagpasar sang ordinansa may kaangtanan sa penalidad sa mga magalapas sa mass gatherings sa syudad sang Iloilo.
Sa interview sang Bombo Radyo kay Iloilo City Councilor Alan Zaldivar, iya ginpahayag nga nagtutok ang iya komitiba sa pagpasar sang ordinansa angot sa pagsuksok sang face shield, face mask kag physical distancing.
Gin-ako ni Zaldivar nga nagakadapat nga hatagan nila sang pagtamod kag igtalupangod ang paghimo sang nagakaigo nga penalidad sa mga magalapas sa mass gathering nga amo ang ginatunaan sang lapnagon nga paglapta sang COVID-19.
Suno sa konsehal, kadungan sini, butangan man sang sistema ang penalidad nga community service para sa mga magalapas sang face shield, face mask kag physical distancing ordinance.
Angot diri, nagakadapat suno sa natungdan nga matumod ang nanuhay-tuhay nga sahi sang community service kag kun ano kalawig ang pagrender sang isa ka protocol violator.
