Ginatinguhaan sang National Grid Corporation of the Philippines (NGCP) nga makaayo ang isa sa 138kV high voltage submarine cable nila nga nasalapay kag naguba samtang nagapatigayon ang Department of Public Works and Highways (DPWH) sang dredging kag re-channeling sa Bio-os River sa Barangay Jagna, Amlan, Negros Oriental.
Ang naga-interconnect nga cable sa tunga sang Negros kag Cebu amo ang duha ka circuit sang NGCP nga 138kV submarine cable nga may 90 Megawatts (MW) capacity kag may total capacity nga 180 Megawatts (MW).
Sa interview sang Bombo Radyo kay Michelle Visera, Corporate Communications Officer sang NGCP, iya ginpahayag nga bangud sa pagkaguba sang isa nila ka circuit, temporaryo nga ginlimitahan sa 90MW ang tranmission capacity sang kuryente nga nagaresulta sa manual load shedding ukon rotational brown out tubtob sa bug-os nga Panay.
Suno kay Visera, ginapatigayon ang manual load shedding bangud critical ang system sang kuryente umpisa las 6:00 sang kasisidmon tubtob las 9:00 sang gab-i rason nga ginapangabay ang mga konsumidor nga magkinot sang kuryente sa amo nga mga oras.
Sa subong suno sa natungdan, nagapadayon ang ila koordinasyon sa mga foreign technical experts para makaayo ang naguba nga linya sang kuryente.
