Nagtililipon ang madamo nga tawo kag naggwa ang mga pasyente sa balkonahe sang ila mga kwarto sa ospital agud nga saksihan ang pagpakita ni Pope Francis sa publiko sa labing una nga tion halin sang nagpaidalom ini sa intestinal surgery.
Naggwa ang 84 anyos nga Santo Papa sa iya nga kwarto sa ospital sa Roma, Italya kag ginpangunahan ang isa ka pangamuyo nga naglawig sang 10 ka minutos.
Nanotisyahan nga ginahapo pa kun kaisa si Pope Francis kag mahinay ang tingog apang malapad man ang yuhom sini sa mga tawo nga nagkadto sa ospital agud nga makita siya.
Nagasinggit ang mga tawo sang “Viva il Papa!” ukon ‘Long Live the Pope’ kag ginwagayway man ang national flags sang Italya.
Sa isa ka bahin sang iya speech, nagpahayag ang Santo Papa nga dapat mangin accessible kag free ang healthcare system para sa publiko.
Wala pa subong nakapahayag ang Vatican kun san-o gid makagwa sa ospital ang Santo Papa apisar una na nga ginpasalig nga yara na ini sa maayo nga kondisyon.
