Patay na sang nasapwan ang isa ka tricycle driver matapos ginapahayag ginbuno sa Botda Village, Barangay Buray, Oton, Iloilo.
Ang biktima amo si Erwin Tacluyan, 57, samtang ang ginapahayag nga suspek amo si Ariston Tamonan, 43, lunsay residente sang nasambit nga lugar.
Sa interview sang Bombo Radyo kay Mary Jean Tacluyan, bayaw sang biktima, iya ginpahayag nga kagab-i, nag-updanay pa si Tacluyan kag Tamonan sa pag-inom-inom malapit sa ila nga balay.
Suno kay Tacluyan, ginabanta pasado las 10:00 na sang gab-i sang nakapauli ang iya nga bayaw sa diin wala na sila nakabatyag kun ano ang masunod nga mga natabo bangud yara naman sila sa ila nga hulot.
Pahayag niya, pagka-aga, tuman na lamang ang iya kakibot sang nakit-an niya nga nagalapta na ang mga gamit sang biktima, wasak na ang pwertahan sang CR sini, kag nasapwan nga nagapaligo na sa iya kaugalingon nga dugo malapit sa dapog.
Gintinguhaan pa nga matabangan ang biktima apang gindeklarar na sang attending physician nga dead on arrival.
Samtang, sa interview sang Bombo Radyo kay Punong Barangay Guilmar Capaciete sang Buray, Oton, Iloilo, iya ginpahayag nga ginapa-imbestigaran na nila ang mga footages sang close circuit television (CCTV) camera.
Pahayag ni Capaciete, nakit-an man ang cellphone kag isa ka panid sang tsinelas sang suspek sa lugar kun sa diin nag-inom-inom ini kaupod ang biktima.
Sa subong suno sa opisyal, padayon pa nga ginapangita sang mga pulis ang suspek nga ginapahayag nakapalagyo.
