Nakagwa na sa presuhan ang pulis nga nadakpan sang Oton Municipal Police Station nga iligal nga nagabulang sa isa ka subdivision sa Barangay Cagbang, Oton, Iloilo.
Ini amo si Police Corporal Virgilio Rojo, 37, residente sang amo nga barangay, kag assigned sa General Services Office (GSO) sang Iloilo City Police Office (ICPO).
Matandaan nga nag-trending pa si Rojo matapos nakuhaan sang video nga nagdinalagan sa talamnan kag nagtuyo nga magpalagyo sang gin-aresto siya sang mga pulis sang nagligad nga Sabado, Hulyo 10.
Sa interview sang Bombo Radyo kay Police Captain Robert Jayson Pancha, hepe sang Oton Municipal Police Station, iya ginpahayag nga temporaryo man nga ginhilway ang apat pa ka nga kaupdanan ni Rojo matapos nakabayad sang tag-P5,000 para sa ila pyansa kahapon sang hapon, Hulyo 12.
Para sa kaso-administratibo sang pulis, magapasa man ang Oton Municipal Police Station sang case folder sa ICPO.
Sa interview sang Bombo Radyo kay Police Captain Shella Mae Sangrines, spokesperson sang ICPO, iya ginpahayag nga maga-report gihapon sa iya duty sa GSO ang amo nga pulis.
Active pa ang status ni Rojo suno kay Sangrines kag wala pa sang relieve order nga ginpapanaog.
Suno kay Sangrines, plano man ni ICPO Director Police Colonel Uldarico Garbanzos nga magrekomenda nga i-relieve sa posisyon si Rojo ukon isaylo sa Regional Personnel Holding and Accounting Unit (RPHAU).
Bisan nalakip si Rojo sa mga nadakpan suno kay Sangrines, magaagi sa gihapon sa due process ang iya kaso gani nga saligan sa gihapon ang mga dokumento kag ebidensya nga makuha sang imbestigador sa banwa sang Oton.
