ILOILO CITY- Nagpaathag ang COVID-19 Team sang Iloilo City Government angot sa pagbakuna sang COVID-19 vaccine nga Pfizer sa mga pamatan-on sa baylo nga sa senior citizens sa Iloilo Convention Center sang Biyernes, Hulyo 9.
Sa interview sang Bombo Radyo kay Mr. Jeck Conlu, spokesperson sang COVID-19 team, iya ginpahayag nga may yara sang kwalipikado nga mga senior citizens kag mga persons with comorbidities apang wala nakaabot sa venue.
Suno kay Conlu, bangod sini gintublok ang nasambit nga mga bakuna sa mga yara sa quick substitution list nga nalakip sa A4 category.
Paathag ni Conlu, sensitibo ang Pfizer bangod nga kinahanglan ini nga matublok sa sulod lang sang 12 oras matapos nga ginpagwa ini sa freezer, kag mahimo ini mapan-os kon madelay.
Nahibaluan nga 1500 doses sang Pfizer vaccine ang gin-allocate para sa mga senior citizens kag mga persons with comorbidities sang amo nga adlaw apang bangud wala nakaabot ang iban, ginhatag sa A4 group ang masobra sa 200 doses.
