Wala sang may nagarequire sa bisan sin-o nga indibidwal, restaurant, karinderya, kag manugluto sa pagsunod sa ginaduso sang Department of Trade and Industry (DTI) nga pagstandardize sang cooking technique sang adobo kalakip na ang iban pa nga tradisyunal nga Filipino dishes agud mapromote sa luwas sang pungsod.
Sa exclusive interview sang Bombo Radyo kay Felisa Judith Degala, director sang DTI- Iloilo, iya ginpahayag nga ‘voluntary standard’ sang pagluto sang adobo ang tinutuyo sang ahensya agud nga mapromote ini internationally.
Buot silingon, indi ini mangin mandatory standard bangud nahangpan sang ahensya nga may linibo ka pamaagi ang mga Pinoy sa pagluto sang adobo.
”That standard is only for the purpose of basic cooking technique for Philippine adobo nga pwede naton mapromote. But there is no such thing as requiring every karinderya or restaurant to only prepare a standard adobo.”
Pahayag ni Degala, sa subong wala pa nakapagwa sang official draft ang central office sang DTI kun ano nga klase sang adobo ang iga-standardize bangud wala man sang may gintumod ang ahensya angot sa ingredients kag istilo sa pagluto sang nasambit nga sud-an.
Dugang pa niya, mangin madugo ang pagstandardize sang cooking technique sang adobo sang pila ka mga eksperto kag chef agud nga mapadayaw ini sang pungsod sa international nga lebel.
Una na ginpaathag sang DTI nga wala sang dapat nga kahangaw-an sa ila ginaduso bangud kabahin lamang ini sang pagdevelop sang mas creative nga industry exports ukon “international promotions” sa mga pagkaon.
