Mapilitan nga magpasaka sang kaso ang operators sang Peryahan ng Bayan batok sa mga pulis nga magapangdakop sa ila sa syudad kag probinsya sang Iloilo.
Nahibaluan nga ginkumpirma sang Philippine Charity Sweepstakes Office (PCSO) nga wala sang permiso nga magpatigayon sang operasyon sa syudad kag probinsya sang Iloilo ang Peryahan ng Bayan.
Sa interview sang Bombo Radyo kay Atty. Bernard Vitriolo, Vice President sang Globaltech Online Gaming Corporation, iya ginpahayag nga palaligbaan kun ngaa subong lamang sila ginpangsaway kag ginapauntat sa ila trabaho sa Peryahan ng Bayan.
Suno kay Vitriolo, madugay na nga nahusayan sa korte nga nationwide ang ila pagpatigayon sang operasyon kag indi matuod ang pahayag sang PCSO nga 15 lamang sa bilog nga Pilipinas ang ila area of operation.
Bangud sini suno sa natungdan, may kinamatarong sila nga magwangal kag magreklamo bangud wala sang nagakaigo nga basehan ang PCSO sa pagpauntat sang ila operasyon nga mangin tunaan sang pagkadula sang trabaho sang pila nila ka mga empleyado.
