Dakop ang siyam ka mga indibidwal matapos ang ginpatigayon nga illegal gambling operation sang Molo Police Station sa Zone 1, Barangay Calumpang, Molo, Iloilo City.
Ang mga arestado amo sanday Retired Police Arnold Alavanzas, 49, residente sang Barangay, Veteranz Village Iloilo City Proper, Renante Magbanua Jr., 23, residente sang Barangay Flores Iloilo City Proper, Josefino Magbanua, 63, residente sang Rizal Estanzuela, Iloilo City Proper Iloilo kag may anom ka mga nagkaladakpan nga lunsay residente sang Barangay Calumpang, Molo, Iloilo City.
Sa interview sang Bombo Radyo kay Police Lt. Marlon Perez, deputy station commander sang Molo Police Station, iya ginpahayag nga nakuha sa operasyon ang P4,500 nga pusta, playing cards, kag iban pa nga mga gamit sa pagsugal.
Suno kay Perez, naaktuhan mismo nila nga nagasugal sa namatyan ang mga arestado.
Samtang ginaaresto, nagdalagan pa palayo ang retired police nga si Alavanzas apang wala man nakaluwas sa ila.
Sa subong suno sa pulis, preso na sa Molo Police Station ang mga arestado kag ginpasakaan na sang kaso nga Illegal Gambling.
Samtang, ginapasalig sang barangay officials sang Calumpang, Molo, Iloilo City ang mas hugot kag istrikto nga pagmonitor sa tanan nga haya sa nasambit nga lugar agud indi na maliwat ang nagakatabo nga mga pasugal.
Sa interview sang Bombo Radyo kay Punong Barangay Roberto Niño Jr., iya ginpahayag nga wala siya naga-untat sa pagpahanumdom sa iya pumuluyo angot sa pagsulundan sang syudad sa diin ginadumilian ang illegal gambling lakip na ang paglimita sa immediate family sa pagtambong sa haya.
Suno kay Niño, apang indi malikawan nga may mga pangayaw nga nakalusot pa sa ila lugar kag nagpamuno sang pasugal.
Maayo na lamang suno sa opisyal nga nangin alerto man ang iya mga pumuluyo sa pagpalab-ot sa mga pulis may kaangtanan sa mga nagpatigayon sang illegal gambling.
