Ilakip na sang syudad sang Iloilo ang mga Overseas Filipino Workers (OFW) bilang priority sa COVID-19 vaccination.
Sa interview sang Bombo Radyo kay Iloilo City Mayor Jerry Treñas, iya ginpahayag nga nagacoordinate ang syudad sa Overseas Workers Welfare Administration (OWWA) agud mas mapahapos ang pagkuha sang mga OFW sang dokumento sa ahensya para sa pagpabakuna.
Suno kay Treñas, ang bakuna nga gintigana sang syudad para sa mga OFW, amo ang vaccine nga gin manufacture sang Pfizer-BioNTech, Moderna kag AstraZeneca.
Pahayag sang alklade, nagakadapat nga makaangkon sang proteksyon batok sa COVID-19 ang mga OFW sa syudad bangud nagasakripisyo ang mga ini sa pagbyahe kag pagtrabaho sa luwas sang pungsod para buhion ang ila mga pamilya.
Nagalaom man si Treñas nga mangin tayuyon na ang COVID-19 vaccination sa tion nga mag-abot na ang ginprocure sang syudad nga 745,000 tanan ka doses sang bakuna halin sa AstraZeneca kag Novavax.
