Posible nga ipaidalom ang Iloilo City kag Iloilo Province sa enhanced community quarantine (ECQ).
Ini ang santo man sa ginpadala nga mensahe ni Department of the Interior and Local Government (DILG) Assistant Secretary Francisco Cruz kanday Iloilo Governor Arthur Defensor Jr. kag Iloilo City Mayor Jerry Treรฑas.
Ini ang epektibo umpisa sa July 16 tubtub 31.
Sa exclusive interview sang Bombo Radyo Iloilo kay Governor Defensor, iya ginkumpirma nga nakabaton siya sang mensahe nga ipaidalom ang Iloilo sa ECQ.
Apang suno sa gobernador, plano sang probinsya nga mag-apelar sa COVID-19 Inter-Agency Task Force for the Management of Emerging Infectious Diseases (IATF-EID) kag sa DILG angot sa proposed quarantine status.
Nahibaluan nga sa subong, napaidalom ang Iloilo City kag Iloilo Province sa Modified Enhanced Community Quarantine (MECQ).
Samtang ang iban pa nga mga lugar sa Western Visayas nga posible ipabilin sa MECQ amo ang Guimaras, Antique, Bacolod, Aklan, Capiz kag Negros Occidental.
Samtang, santo naman sa ginpagwa nga pahayag ni Iloilo City Mayor Jerry Treรฑas, nakalab-ot na sa iya ang proposed quarantine classification status para sa Iloilo City kag indi man magduha-duha ang syudad sa pag-apelar sa IATF.
Suno kay Mayor Treรฑas, indi siya magpasugot nga siraduhon ang tanan nga negosyo sa tion nga ipaidalom ang syudad sa enhanced community quarantine (ECQ) status.
Pahayag sang alkalde, ini bangud tuman na ka pin-ot sang sitwasyon kag kapigaduhon tuga sang pandemya kag indi na makasarang ang syudad sa tion nga ipasirado ang mga establisemyento kag madulaan sang trabaho ang mga tawo.
