ILOILO CITY- Indi na mabatas pa ni Iloilo City Mayor Jerry Treñas nga palawigon pa ang lockdown sa syudad.
Ini kasunod sang rekomendasyon sang National Inter-Agency Task Force (NIATF) nga ipaidalom sa Enhanced Community Quarantine (ECQ) status ang Iloilo City kag amo man ang Iloilo Province umpisa sa Hulyo 16 tubtob 31.
Sa interview sang Bombo Radyo kay Mayor Treñas, iya ginpahayag nga hingagawon niya nga i-apelar ini subong nga adlaw.
Suno sa alkalde, nagpakig-angot na siya kay Department of Interior and Local Government Secretary Eduardo Año kag sa iban pa nga katapo sang NIATF agud hingyuon nga indi lang pagdayunon ang pagpatuman sang ECQ sa Iloilo City.
Sa bahin naman sang Iloilo Province, ginpahayag ni Governor Arthur Defensor Jr. nga i-apela man niya nga sa baylo nga bilog nga probinsya, ang mga banwa lang nga may mataas nga kaso sang COVID-19 ang ipaidalom sa ECQ.
Suno sa gobernador, indi practical kon bilog gid nga probinsya ang ipaidalom sa ECQ kag mas maayo kon surgical lockdown lang ang ipatuman bangod ini ang mas bagay sa socio-economic condition sang probinsya.
Dugang pa niya, ini ang pamaagi sa pagbalanse sang sitwasyon sa probinsya bangud samtang nagadugay ang community quarantine, mas nagabug-at sa timbangan sang ginahatagan sang prayoridad ang socio-economic nga kondisyon sang pumuluyo.
