Gin-ako sang Department of Social Welfare and Development (DSWD) Region VI nga indi nila masarangan ang P150,000 ka food packs per week nga ginahingyo ni Iloilo City Mayor Jerry Treñas sa tion nga madayon ang pagpaidalom sa syudad sa enhanced community quarantine (ECQ).
Una na ginpahayag ni Mayor Treñas sa interview sang Bombo Radyo nga 500,000 ang populasyon sang syudad, samtang, 2 million naman ang populasyon sang probinsya sang Iloilo.
Bangud sini suno sa alkalde, nagakadapat nga maghatag ang DSWD sa probinsya sang 600,000 food packs per week, samtang P150,000 food packs per week, naman sa syudad sang Iloilo.
Sa interview sang Bombo Radyo kay Evangeline Felicio, Assistant Regional Director for Administration sang DSWD Region 6, iya ginpahayag nga tam-an kadako ang volume sang food pack kada semana nga ginapangayo sang alkalde sang syudad.
Suno kay Felicio, ini bangud magluwas sa Iloilo City, pila pa ka mga lugar sa rehiyon ang ginabuligan man nila.
Gin-ako sang natungdan nga nahangpan nila ang alkalde apang sa subong, indi nila masarangan ang ginahingyo sini.
Nagpasalig man si Felicio nga tinguhaan nila nga ipalab-ot sa central office ang food packs nga ihatag sa mga pumuluyo nga temporaryo nga madulaan sang trabaho sa tion nga ipaidalom ang syudad kag probinsya sang Iloilo sa ECQ.
