ILOILO CITY- Naglab-ot na sa masobra tunga sa milyon nga mga pumuluyo sa Western Visayas ang natublukan sang first dose sang COVID-19 vaccine.
Sa interview sang Bombo Radyo kay Dr. Mary Jane Juanico, Chief sang Infectious Disease Cluster sang Department of Health (DOH) Region 6, iya ginpahayag nga as of July 13,2021, yara na sa 500,471 na ang nabakunahan sang first dose kag kapin 9 percent ini sang 5.2 million nga target nga matublukan.
Suno kay Juanico, yara naman sa masolosobra 100,000 ang natublukan sang second dose kag kapin 2% lang ini sang target sa Rehiyon 6.
Positibo naman si Juanico nga sa pag-inabot sang dugang nga mga bakuna sa Rehiyon 6, mapadasig man ang pagpangbakuna sa mga pumuluyo sa bilog nga Western Visayas.
Wala naman nagapati si Juanico nga may yara sang Palakasay system sa alokasyon sang bakuna sa mga lugar sa pungsod ilabi na sa rehiyon.
Suno sa iya, ang National Vaccine Operation Center nga ginabug-usan sang nanuhay-tuhay nga ahensya sang gobyerno amo ang nagapartisiner sang mga bakuna nga ginapadala sa mga syudad kag probinsya depende sa kon anu nga lugar ang mas nagakinahanglan sang bakuna.
Samtang, gin- athag ni Juanico nga indi kinahanglan ang medical certificate para sa mga magapabakuna.
Suno sa iya,gina-require lamang ini sa mga tawo nga may yara sang pila ka kondisyon kaangay sang autoimmune disease, balatian nga mahimo magresulta sa mga komplikasyon, mga HIV patients, kag mga tawo nga nagabaton sang cancer treatment kag iban pa nga therapy.
