Nagalaum ang mga tricycle drivers sa syudad sang Iloilo nga indi lang sila pagdumili-an sa pagbyahe kadungan sang pagpaidalom sa Iloilo City sa Enhanced Community Quarantine (ECQ).
Sa interview sang Bombo Radyo kay Garry Jimenez, tricycle driver, iya ginpahayag nga nagakabalaka sila bangud mahimo nga subong ukon bwas, malakip sa bag-o nga executive order ni Mayor Jerry Trenas ang pagdumili sa ila sa pagbyahe.
Kun matabo ini suno sa iya, wala na sila sang may makuhaan sang inug gasto sa pang adlaw-adlaw bangud ang pagdrive sang tricycle amo ang ila palangabuhian.
Maayo man kuntani pahayag ni Jimenez kun may ihatag nga ayuda ang gobyerno tubtob magtakop ang ECQ status sa syudad.
Apang kun matigayon gid nga indi sila makabyahe, suno sa driver, mangita na lang siya sang iban nga pamaagi agud nga may ihatag man sa pamilya nga inugbakal sang bugas kag sud-an.
