Ginpat-od sang alkalde sang Pandan, Antique nga wala sang nagakadapat kahangaw-an ang mga tawo sa delta variant nga nadetect sa nasambit nga lugar sang Mayo 8.
Lunsay senior citizens nga mag-asawa ang mga pasyente — napatay ang asawa nga naga-edad 78 kag nakarecover naman ang bana nga naga-edad 79.
Sa interview sang Bombo Radyo kay Pandan, Antique Mayor Plaridel Sanchez VI, iya ginpahayag nga matapos nagpadulong sa Kalibo, Aklan ang asawa para sa iya regular check-up bangud sa balatian nga diabetes, didto na nag-umpisa ang paglain sang pamatyag sini.
Gin-admit ang tigulang nga babaye sa isa ka ospital sa Pandan, Antique kag ginbawian sang kabuhi sang Mayo 28 bangud sa COVID-19.
Sa ginpatigayon nga contact tracing, nagpositibo man sa COVID-19 ang iya nga bana, ila bata nga lalaki, kag ang ila nga timbang sa diin lunsay wala man ang mga ini nakaangkon sang severe nga kondisyon.
Apang sa subong suno sa alklade, matapos ang duha ka semana, fully recovered na sa COVID-19 ang mga natungdan.
Paathag ni Sanchez, wala man sang travel history ang mag-asawa bangud lunsay senior citizens na ang mga ini.
Una naman ginpahayag ni Antique Governor Rhodora Cadiao sa interview sang Bombo Radyo nga kuntani indi na pagbuksan ini nga kaso bangud nagatuga lang sang panic sa publiko kag makaluluoy man ang Iloilo City kag Iloilo Province nga amo ang tuman nga naapektuhan bangud amo ini ang ginpaidalom sa Enhanced Community Quarantine (ECQ).
