Wala nakabutwa ang Phoenix Suns batok sa Milwaukee Bucks sa game 5 sang NBA Finals, sa score nga 123-119.
Ginpakahuy-an sang Bucks sa atubang sang linibo ka mga fans ang Phoenix Suns kag gin-angkon ang 3-2 nga lead.
Sa interview sang Bombo Radyo kay Jophil Cercado, basketball trainor kag coach sang Province of Iloilo Sports Program, iya ginpahayag nga sa tatlo ka minutos nga nabilin sa 4th quarter, gintinguhaan pa sang Suns nga makalagas gamit ang 12-3 run kasunod 14 points nga abanse sang Bucks.
Diri kag ginhingalitan sang Suns ang wala nakasulod nga free throw shots ni Giannis Antetokounmpo.
Apang nagbida sa gihapon ang anay two-time MVP sang napasulod ang tira halin sa pagpasa ni Jrue Holiday kag ang crucial shot ni Khris Middleton.
Nakaabanse man ang Phoenix sa first quarter, apang wala na nakabutwa batok sa Bucks sa 2nd quarter tubtob sa 4th quarter.
Suno kay Cercado, nangin epektibo ang defensive game sang Bucks, kag ang ila natural nga talento kag diskarte ang isa sa dako nga liyabe nga nagdala sa ila sang kadalag-an.
Gintapos ni Antetokounmpo ang game 5 nga may 32 points, nine rebounds kag six assists.
Samtang may 27 points naman nga amot si Middleton kag gindugangan pa ni Holiday sang 27 points kag 13 assists.
Bantayan sa Bombo Radyo Iloilo sa Hulyo 21, 2021, ang update sa Game 6 sang NBA Finals.
