Natigayon na nga ma-cremate ang bangkay sang isa ka manunudlo kasunod sang pagpa-Bombo sang iya misis batok sa Iloilo Provincial Hospital sa Pototan, Iloilo bangud ginpabay-an lang nga manimaho na ang bangkay sang iya bana sa morgue.
Sa interview sang Bombo Radyo kay Jonalyn Julleza, iya ginpahayag nga inhustisya nga makabig ang ila nga naagyan matapos nga nagsobra sa 24 ka-oras ang pagpabilin sang bangkay sang iya bana sa morgue samtang ginahulat ang resulta sang swab test sini.
Suno kay Julleza, tuman ka hapdi para sa ila nga mahibaluan nga wala man lamang ginputos sang maayo ang bangkay sang iya bana sa morgue kag apisar bag-o pa lamang ini napatay, ginhusgaran na sila sang ila kasilingan nga sa COVID-19 napatay ang iya nga bana sa baylo nga sa stroke.
Nagpanawagan man ang misis sang igtalupangod kag bulig kay Pototan, Iloilo Mayor Rafael Enrique Lazaro nga abyan man sang iya nagtaliwan nga bana.
Sa pihak sini, dako ang pagpasalamat ni Julleza sa Bombo Radyo bangud naaktuhan ang ila nga problema.
Samtang, pahayag naman sang pamunuan sang punerarya nga nagkuha sa bangkay sang manunudlo sa morgue sang Iloilo Provincial Hospital sa Pototan, Iloilo, indi insakto nga ginpalapaw pa sa 24 ka-oras ang pagpabilin sa lawas sang patay sa morgue.
Sa interview sang Bombo Radyo kay Greg Abecia, tag-iya sang GEGATO-ABECIA FUNERAL HOMES & CREMATORY, INCORPORATED, iya ginpahayag nga protocol sang Department of Health nga isulod sa cadaver bag ang bangkay nga yara sa morgue.
Apang suno kay Abecia, pagkuha nila sang bangkay sang lalaki, nakaputos lamang sa garbage bag ang ulo sini kag wala nalakip ang bilog nga lawas.
Nagapati ang natungdan nga nagakadapat ang gobyerno ang nag-akto sa sini nga reklamo.
