Nagapanagtag ang opisina ni Iloilo City Lone District Rep. Julienne ‘Jamjam’ Baronda sang cash assitance sa mga pumuluyo sang syudad nga nadulaan sang trabaho ukon naapektuhan ang kita sa tunga sang Enhanced Community Quarantine (ECQ) status.
Sa exclusive interview sang Bombo Radyo kay Rep. Baronda, iya ginpahayag nga P5,000 ang ginapanagtag sa mga pumuluyo nga naapektuhan sang ECQ status kaangay sang zumba kag gym instructors, mga bulag sa hilot massage kag sa mga simbahan kag iban pa.
Sa palaabuton nga Myerkules, ang transport sector naman ang pagahatagan sang ayuda.
Suno kay Baronda, agud nga malikawan ang pagtililipon sang mga tawo sa gwa sang iya opisina, gina-abisuhan niya ang sektor sang transportasyon nga posible magasend na lamang sila sang code agud ma-claim ang ayuda sa pera padala centers.
Padayon man ang pagpangita sang natungdan sang dugang nga pondo agud mas madamo pa ang mabuligan sa syudad sang Iloilo.
May kaangtanan naman sa food boxes nga ginapanagtag sa kada barangay sang syudad, lauman suno kay Baronda nga may dugang pa nga magaabot nagikan sa Department of Social Welfare and Development.
