Nagapati ang bise-alkalde sang syudad sang Iloilo nga wala sang basehan kag wala nagasalanto ang desisyon sang COVID-19 Inter-Agency Task Force for the Management of Emerging Infectious Diseases (IATF-EID) sa pagpaidalom sa Iloilo City sa Enhanced Community Quarantine (ECQ).
Sa interview sang Bombo Radyo kay Iloilo City Vice Mayor Jeffrey Ganzon, iya ginpahayag nga tuman kalayo sa syudad ang Pandan, Antique kun sa diin na-detect ang duha ka kaso sang delta COVID-19 variant.
Suno kay Ganzon, ginarespeto niya ang national government apang kun siya ang maglantaw, nagakadapat nga lantawon nila liwat ang ginpatuman nga quarantine classification sa syudad.
”Wala bala sa lugar, ang desisyon nila wala sang basis eh, kalayo to ya ang insidente sang gina-claim nila nga variant ya sa Pandan, Antique, mga 6 hours na nga byahe mo. Maayo gid na kun mag second look sila, maplastar nila sang husto. Unfair katama sa aton nga mga Ilonggo.”
Nagalaom man si Ganzon nga sa labing madali nga panahon, kuntani mapahalugan na sang IATF ang classification sang Iloilo City.
