Indi pa mapat-od sang Miag-ao Municipal Police Station ang rason sang kamatayon sang ginapahayag naghikog nga police personnel sa kagulangan sang Barangay Damilisan, Miag-ao, Iloilo.
Ang biktima amo si Patrolman Marvin del Castillo, 27, tumandok sang Devera, Sara, Iloilo apang temporaryo nga nagaistar sa Purok 2, San Joaquin, Iloilo,kag isa ka police trainee nga assigned sa San Joaquin Municipal Police Station kag nagapaidalom sa Pre Basic Internal Security Operation Course.
Sa interview sang Bombo Radyo kay Police Captain Marvin Buenavista, hepe sang Miag-ao Municipal Police Station, iya ginpahayag nga nagapakig-angot na sila sa pamilya sang pulis lakip na sa asawa sini agud matumod kun may problema ang ila nga himata.
Suno kay Buenavista, magluwas sa nasapwan nga armas-luthang sang pulis, nakit-an man sa kilid sang lawas sini ang isa ka botelya sang makahulubog nga ilimnon.
Dugang pa niya, hulaton anay nila ang laboratory results angot sa armas-luthang nga nakit-an sa insidente lakip na ang paraffin test agud matumod kun matuod nga nakapalupok sang armas-luthang ang biktima.
