Mas hugtan pa sang syudad sang Iloilo ang protocol sa pagbaton sang mga returning overseas filipinos (ROFs), Authorized Persons Outside Residence (APOR) kag Locally Stranded Individuals (LSIs).
Ini matapos madamo sang narekord ang syudad nga panibag-o nga COVID-19 cases halin sa mga natungdan kasunod sang Delta COVID-19 variants nga narekord sang Department of Health sa National Capital Region (NCR).
Sa interview sang Bombo Radyo kay Iloilo City Mayor Jerry Treñas, iya ginpahayag nga nagaplano na nga magdugang sang quarantine facility inkaso nga makasulod sa syudad ang mga pasyente nga positibo sa Delta COVID-19 variant.
Tinguhaan man sang syudad nga madugangan ang suplay sang hospitals beds, oxygen tank, kag mga bulong.
Ginmanduan man sang alkalde ang City Health Office nga makig-angot sa Regional Inter-Agency Task Force (RIATF) agud nga mapahanumdom ang NCR kag iban nga lugar sa rehiyon sang ila gatekeeping obligations agud masigurado nga negatibo sa COVID-19 ang mga byahero nga naga-abot sa syudad sang Iloilo.
Dugang pa ni Treñas, umpisa sa Sabado, Hulyo 24, i-require sa mga magapauli nga APOR, ROFs, kag LSIs ang negative reverse transcription polymerase chain reaction (RT-PCR) test 72 hours antes ang byahe.
