Ginahulat sang San Joaquin Municipal Police Station ang resulta sang ballistic examination sa armas-luthang nga nasapwan matapos ginapahayag naghikog ang isa ka police trainee sa tunga sang kagulangan sa Barangay Damilisan, Miag-ao, Iloilo.
Ang biktima amo si Patrolman Marvin del Castillo, 27, tumandok sang Devera, Sara, Iloilo apang temporaryo nga nagaistar sa Purok 2, San Joaquin, Iloilo,kag isa ka police trainee nga assigned sa San Joaquin Municipal Police Station kag nagapaidalom sa Pre Basic Internal Security Operation Course.
Sa interview sang Bombo Radyo kay Police Lt. Dionisio Estacio, hepe sang San Joaquin Municipal Police Station, iya ginpahayag nga indi pa matumod kun sa diin naghalin ang armas-luthang nga nakit-an sa insidente bangud wala man gina-isyuhan sang service firearm ang isa ka indi pa full-fledged nga pulis.
Ini bangud wala pa natapos sang biktima ang iya Basic Internal Security Operations Course (BISOC).
Suno kay Estacio, tubtob subong, wala nila ginhuna-huna nga matabo ini kay del Castillo bangud aktibo man ini sa trabaho kag wala man sila sang may nakita nga senyales nga nagasuprir ini sa depresyon.
Dugang pa niya, bisan isa ka bes, wala man nakapanugid si del Castillo nga may problema ini ukon may ginabatyag.
