Nagpanawagan ang pamunuan sang Iloilo Police Provincial Office (IPPO) sa mga pulis nga may mental health problems.
Ini matapos nakalab-ot na sa igtalupangod sang IPPO ang natabo sa isa ka police personnel nga ginapahayag gin-utas ang kaugalingon nga kabuhi sa Barangay Damilisan, Miag-ao, Iloilo.
Sa interview sang Bombo Radyo kay Police Col. Gilbert Gorero, director sang IPPO, iya ginpahayag nga nagahingyo siya sa mga police personnel nga magtuad kun may yara sang problema, kun nagakapressure kag nagakabatyag sang tuman kakapoy sa trabaho agud mahatagan sang nagakaigo nga pagbulong ukon intervention.
Suno kay Gorero, may yara sila sang mental health management program nga ginatawag nga e-Gabay para sa mga pulis nga naga-eksperyensya sang pagpanghangkat ukon kabudlay sa trabaho, personal nga mga isyu, pinamilya nga problema kag iban pa.
Apang kinahanglan lamang suno kay Gorero ang ‘acceptance’ para sa mga pulis kag indibidwal nga may mental health issues agud matuad ang ginabatyag kag mabaton ang realidad nga nagakinahanglan ang mga ini sang nagakaigo nga bulig.
”Acceptance is the first key to answer our problems in mental illness because kun indi ka kabalo magbaton sang reality and to embrace it, paano mabal-an sang iban nga mga tawo ang aton ginabatyag? I am calling to all uniform personnel, sometimes ginakaya-kaya lang naton ang tanan nga nagakalatabo…”
Sa pihak sini, ginpahayag ni Gorero nga nagapalab-ot sang pagpakig-unong ang bug-os nga IPPO sa pamilya sang pulis nga napatay sa diin ginpat-od niya nga may nagakaigo man nga bulig nga ihatag ang Philippine National Police.
