Alpha, Beta variants sang Covid-19, yara na sa Western Visayas ‘as early as April’ subong nga tuig — DOH

Ginkumpirma sang Department of Health (DOH) Region VI nga naglapta na sa lain-lain nga lugar sa Western Visayas ang nanuhay-tuhay nga variant sang COVID-19 ‘as early as April’ subong nga tuig.

Sa interview sang Bombo Radyo kay Dr. Jessie Glen Alonsabe, head sang Regional Epidemiology and Surveillance Unit (RESU) sang DOH Region VI, iya ginpahayag nga magluwas sa Iloilo Province, may lain na nga variants sang COVID-19 sa Antique, Guimaras, Bacolod City, Capiz, kag Negros Occidental.

“Daw halos tanan nga probinsya sa Western Visayas, may ara nga mga cases sang Alpha kag Beta variant,” pahayag ni Alonsabe.

Subong lang nga hapon sang ginkumpirma ni Iloilo Provincial Administrator Atty. Suzette Mamon nga may 15 na ka Alpha variant sa probinsya sang Iloilo, 14 ka Beta variant, kag 1 ka P.3 variant ukon variant nga una na-detect sa Pilipinas.

Suno kay Alonsabe, may returning overseas Filipinos kag local cases sa sini nga narekord nga mga variants sa Western Visayas.

“Halin pa sang Abril, may ara na kita sang mga kaso sini nga variants,” pahayag pa ni Alonsabe.

Nakarecover na suno sa natungdan ang tanan nga pasyente nga infected sang sini nga mga variants sang COVID-19.

Sa pamangkot kun may dapat ini kahangaw-an, sabat sang health official: “Concerned kita eh kay ari na na di sa aton. May red flag na kita. May kaso na kita. Indi kita maghambal nga indi kita maalarma kay dugay na ini siya. Mag-aligmat na kita kag mag-andam na kita.”

Apang, ‘may variant man ukon wala’, amo gihapon nga paghalong ang kinahanglan suno sa iya.

“Klaruhon naton, no. Palarehas lang ini sila tanan. Variant man ini siya ukon indi, nabalaka gid kita. Kun original man ini siya ukon may mga variants man siya, maghalong man kita gihapon. Indi na maghulat sa DOH nga maghambal nga makalalaton ini ukon indi,” abiso sang natungdan sa publiko.

Wala man sang pagbag-o sa COVID-19 management strategy suno sa natungdan.

“Wala sang pagbag-o. Ang himuon naton tanan, serysohon naton ang panugyan sang national government kag sang local government. Kay te bisan anhon namon, kun wala nagakooperar ang tawo kag wala ginaseryoso ang minimum public health standards, kita man lang gihapon ang maga-suprer, ” dugang pa ni Alonsabe.