Ginkumpirma ni Kai Sotto nga indi siya mag-upod sa Gilas Pilipinas sa 2021 FIBA Asia Cup sa Indonesia bangud kinahanglan niya nga matuman ang commitments sa team Adelaide sa Australian National Basketball League.
Suno kay Sotto, yara na siya sa Adelaide City sa Agusto 1 — duha ka adlaw antes ang pag-umpisa sang continental tournament sa Jakarta.
Pahayag pa sang basketball player, ang paghampang niya sa NBL ang isa ka critical step sa iya basketball journey kag subong nga natapos na niya ang qualifier window kag Olympic Qualifying Tournament commitments sa national team, luyag na niya subong nga magfocus sa Adelaide 36ers.
Nagpangayo man sang paghangop si Sotto sa publiko sa iya nangin desisyon nga mag-upod sa Adelaide kag ipa-iway ang national team.
Ginpasalig man sang 7 feet 2 inches nga si Sotto nga magabalik siya sa Gilas Pilipinas nga mas mabakod kag mas eksperyensyado pagkatapos sang hampang sa Australia.
