Nagakadapat suno sa isa ka public health expert nga mahangpan sang tanan nga lapnagon ang COVID-19 sa bilog nga kalibutan rason nga apisar fully vaccinated na ang isa ka indibidwal, may nagakatabo sa gihapon nga breakthrough infection.
Sa interview sang Bombo Radyo kay Dr. Philip Ian Padilla, vice chancellor for academic affairs sang University of the Philippines (UP) Visayas, iya ginpahayag nga dako ang bentaha kun nabakunahan na ang isa ka indibidwal batok sa COVID-19 bangud sa tion malatnan ini sang virus, indi ini mangin malala kag makatuga sang kamatayon.
Santo sa data suno kay Padilla, nakit-an nga epektibo nga pambato sa virus kag mangin sa mga mas makalalaton nga sahi sang variant ang bisan ano nga brand sang COVID-19 vaccine.
Sa subong suno sa ekperto, padayon ang clinical trial nga ginahimo sa mga bakuna sa diin wala pa sang rekord nga nagapakita nga nagabuhin ang effectivity sang vaccine over time.
Panugyan naman sa publiko sang isa ka integrative healing advocate, agud malikawan nga malatnan sang COVID-19, pakamaayuhon nga indi lamang mag-obserba sang minimum public health standard sa publiko nga lugar kundi mangin sa sulod sang puluy-an.
Sa interview sang Bombo Radyo kay Engineer Nilo Jardeleza, iya ginpahayag nga agud maproteheran ang kaugalingon kag ang kaugalingon nga pamilya, nagakadapat nga kabigon sang isa ka indibidwal nga positibo siya sa COVID-19 agud nga bisan yara lamang sa sulod sang balay, mangin maid-id ini sa pagsunod sa health protocols.
Nagakadapat man suno sa iya nga magsuksok sang facemask ang tanan kun nagasugilanon ilabi na sa sulod sang balay, mag-obserba sang proper air ventilation kag magsunod sa physical distancing.
