Sa labing-una nga tion sa sulod sang kapin 100 ka tuig, naglanog kag nabatian sa Olimpyada ang matunog nga tokar sang Philippine National Anthem samtang ginalantaw sang bilog nga kalibutan nga ginapasaka ang hayahay sang Pilipinas.
Ini ang makatalandog-balatyagon nga eksena sa Tokyo International Forum sa Tokyo, Japan matapos nakuha sang 30-anyos nga Filipina athlete nga si Hidilyn Diaz ang labing-una nga Olympic gold medal para sa pungsod.
Nangin maragtason ang pagdaug ni Diaz sa 55kg event sang weightlifting competition kun sa diin nakahimo siya sang Olympic rekord nga 224kg kun sa diin 97 kg diri ang snatch kag 127 kg ang rekord sa clean and jerk.
Ginpierde sang nasambit nga Zamboanga pride ang world champion nga si Liao Qiuyun sang China.
Si Diaz man ang labing-una nga Filipina athlete nga nakaangkon sang double Olympic medals matapos nga nakuha man niya ang silver medal sa 2016 Rio Olympics.
Kasunod sini, nagbubo man ang emosyon sang Team Pilipinas bangud magluwas nga first-time ini nga kadalag-an para sa pungsod, natabo pa ang maragtason nga daug ni Diaz sa tunga sang COVID-19 pandemic.
Sa exclusive interview sang Bombo Radyo kay Team Philippines chef de mission to the Games Mariano ‘Nonong’ Araneta, iya ginpahayag nga malipayon gid ang bug-os nga delegasyon sang Pilipinas bangud worth it ang tanan nga training ni Diaz apisar nga nakaagi ini lockdown sa iban nga pungsod.
Nagahulat kay Diaz suno kay Araneta ang P33 million nga incentive kag posible pa nga may house and lot nga ihatag.
Nagalaum man si Mariano nga indi lang si Diaz ang makakuha sang medalya para sa Pilipinas kundi pati man ang iban pa nga atleta nga yara subong sa Tokyo, Japan.
Wala sang sudlan ang kalipay sang Pamilya Diaz sa Zamboanga matapos nauyatan na gid man ni Hidilyn Diaz ang maila nga Olympic gold medal para sa Pilipinas.
Sa exclusive interview sang Bombo Radyo kay Mrs. Emelita Diaz, iloy ni Hidilyn, iya ginpahayag nga kapin isa ka tuig na nila nga wala nakit-an ang iya anak bangud sa training sini para sa Olimpyada.
Suno sa iloy, nakamuno si Hidilyn nga maga-retire na ini sa weightlifting apang luyag pa nga magpartisipar sa Southeast Asian Games ukon SEA Games.
Tuman man ang pagpasalamat sang iloy sa tanan nga nagpangamuyo kag nagsuporta sa iya nga anak halin sang nagaumpisa pa lang ini sa iya nga karera.
14 anyos si Hidilyn sang una nga nag-intra sa 2008 Beijing Games kun sa diin may yara siya sang wild card entry kag pinakabata sa amo nga delegasyon.
Nag-qualify liwat siya sa 2012 London Olympics apang may yara sang “did not finish” result.
Sa 2016 nga women’s 53-kilogram event sa Rio Olympics, naghimo siya sang maragtas bilang first Filipina Olympic silver medalist.
Subong nga tuig, ginkilala na si Hidilyn bilang labing-una nga Filipino athlete nga nakaangkon sang bulawan nga medalya sa Olimpyada.
