Kadungan sang courtesy call ni Hidilyn Diaz kay Presidente Rodrigo Duterte via video-conferencing, ginpanginbulahan sang chief executive ang labing-una nga Pinay Olympic gold medalist.
Gin-garantiya sang Presidente ang isa pa ka “fully furnished” nga house and lot incentive kay Diaz sa iya hometown sa Zamboanga City.
Hatagan man sang dugang P3 million cash incentive si Diaz nagikan sa Office of the President magluwas sa P10 million cash incentive nga award sang Philippine Sports Commission (PSC) bilang kabahin sang Expanded Athletes Incentives Act para sa Olympic gold medal.
Suno kay Presidente Duterte, hatagan man si Diaz sang presidential merit MEDAL kasunod sang pagdala niya sang dako nga dungog para sa pungsod.
“As expected the nation is ecstatic about your achievement. Your achievement is the achievement of the Philippine nation,” pahayag ni Duterte.
Dugang pa sang Presidente, nagasuludo siya kay Diaz bangud sa iya gindala nga kadalag-an nga nagbatak sa pungsod.
Tuman man ang pasalamat sang Pinay weightlifter sa Presidente.
Nahibaluan nga magluwas sa non-cash incentives nga mabaton ni Diaz, naglab-ot na as of July 28 sa kapin P43.5 million ang kabug-usan nga cash incentives para sa Pinay Olympic gold medalist.
Matandaan nga nagbubo ang pag-abi-abi sang mga Filipino kay Diaz kadungan sang iya pag-abot kahapon sa Pilipinas.
Sa iya pag-abot sa Ninoy International Airport Terminal 2, suksok sang 30 anyos nga women’s weightlifting champion ang gold medal halin sa Tokyo Olympics.
Kaupod man ni Diaz sa iya pagpauli sa pungsod si 2019 SEA Games gold medalist and Olympic Finalist Margielyn Didal.
Ginsugata ang Pinay weightlifter sang iya mga kaupdanan sa Philippine Air Force kag pila ka personnel sang Philippine Navy lakip na ang Philippine Sports Commission.
Nahibaluan nga myembro si Diaz sang Civil Military Operations Group sang Philippine Air Force sa diin gin-promote siya bilang staff sergeant matapos napauli ang gold medal sa Olympiyada.
Apisar nagbubo ang ulan, ginbinuksan ni Diaz ang bintana sang ginasakyan nga coaster van kag proud nga ginpakita ang una nga gold medal sa Olympics para sa Pilipinas.
