Ginkibot sang four-time Olympic gold medallist nga si Simone Biles ang bilog nga kalibutan sang nag-withdraw ini sa women’s gymnastics team final sa nagapadayon nga Tokyo Olympics.
Sa edad nga 24 anyos, ang nasambit nga US superstar gymnast amo ang ginalantaw nga greatest female Olympian sa Tokyo, Japan subong nga tuig.
Nagapanguna siya sa United States’ defense sa ila women’s gymnastics team title kag ginalauman kuntani nga madugangan ang iya apat ka bulawan nga medalya nga nadag-an sa 2016 Rio Olympics.
Apang subong nga tuig, nag-score si Biles sang 13.766 – ang iya pinakamanubo nga Olympic vault score – antes siya nag-isol sa event.
Matapos nagwithdraw sa kumpetisyon, ginapaabot na nga ‘mabuhinan ang sponsorship kag publicity’ para kay Biles apang baliskad sa popular opinion nga ‘losers ang quitters’, ginakabig si Biles nga ‘winner’ para sa mata sang mga mental health professionals.
‘TWISTIES’
Sang nadulaan sang balanse si Biles sa tunga-tunga sang iya two and a half twists sa women’s team final, maathag nga may yara sang sala kag indi ordinaryo nga hitabo — butang nga ginpahayag sang superstar gymnast nga ‘twisties’ antes ang iya dramatic exit.
Ang twisties, sandig sa definition sa gymnastics, ang matabo kun madula sang isa ka gymnast ang iya sense of space kag dimension samtang yara sa hangin rason nga nagakadula ang kontrol sa lawas kag mahimo ang mga ekstra nga twists kag flips bisan indi man hungod. Kun kaisa, mahimo pa ini tunaan sang indi safe nga pagtupa ukon landing. Sa malip-ot nga pulong, ginatawag ini nga mental block.
“I don’t trust myself as much anymore. Maybe it’s getting older. There were a couple of days when everybody tweets you and you feel the weight of the world. We’re not just athletes. We’re people at the end of the day and sometimes you just have to step back,” kabahin sang emosyonal nga pahayag ni Biles.
‘A SUPER ATHLETE AND… A BRAVE WOMAN’
Sa interview sang Bombo Radyo kay Professor Moniq Muyargas sang University of the Philippines in the Visayas, isa ka mental health professional, iya ginpahayag nga ‘compounded’ na ini nga balatyagon bangud sang tuman ka daku nga pressure nga ginadala ni Biles.
“Even ang iya nga childhood na-sacrifice ya na just for the love of the sport. It came to a point nga ‘Tama na’. Napuno na siya,” pahayag ni Muyargas nga posible indi na makita ni Biles ang kalipay nga una niya nga nakit-an sa gymnastics.
Lakip sa mga factor nga naga-contribute sa sini nga balatyagon suno kay Muyargas amo ang: tuman ka taas nga expectation, stress, fatigue, mental pressure — kag ang pinakaginapaabot nga rason subong nga panahon, balatyagon sa tunga sang pandemya.
“I dont’t like to think of it as her being a loser because nag-back out siya. Remember, she is going to lose a lot of sponsorship and publicity. But I think, as a mental health professional, I would like to belive that she is a winner because it is not easy to go public about mental health concerns particularly at the peak of your career with so much in line and so much to lose,” dugang ni Muyargas.
May tyempo gid suno sa iya nga makasiling ang tawo, “I’m done, I cannot anymore move forward because this is not going to be the best of me” — butang nga natabo bisan pa sa pinaka-popular nga gymnast.
“There is only one Simone Biles and we will remember her for her achievements, for her being a super athlete, and for her being a brave woman.”
‘IKAW… BISAN INDI KA MAN SI SIMONE BILES’
Importante ini subong nga tion sang COVID-19 pandemic. Suno kay Muyargas, indi lang ‘overnight’ nga nagadevelop ang amo sini nga balatyagon bangud nagatingob ini tubtub nga nagahimo na nga ‘inner turmoil’.
Subong nga tion, tuman ka damo suno sa natungdan ang naga-eksperyensya sang depression kag extreme anxiety — mga ginakabig indi makit-an nga kaaway ‘sa lain-lain nga paagi kag istorya’.
Sa masobra isa ka tuig nga pangabuhi sa tunga sang pandemya suno sa natungdan, wala sang preparado kag wala sang maka-adjust sang tuman kadasig.
“No one is spared. Some of us are resilient. Some of us are not. This is the time to educate people,” pahayag ni Muyargas nga nagatumod pa nga indi dapat pag-i-stigmatize ang depression kag ang tanan nga sahi sang mental health issues.
Panugyan sang natungdan sa kada isa, dapat i-maximize ang use of technology agud nga maka-communicate sa mga tawo sa palibot kag makamusta ang mga tawo.
“We need to help each other, we need to become support groups,” dugang pa ni Muyargas. #
