Kadungan sang pag-angkon sang isa ka indibidwal sang bugay ukon blessings, pat-od nga may dala ini nga dako nga responsibilidad.
Sa interview sang Bombo Radyo kay Francis Ray Subong, registered guidance counselor, iya ginpahayag nga masami nagapanago ang mga tawo sa tinaga nga ‘too blessed to be stressed’ kun indi na nila ma-agwantahan ang paghakwat sang stress tuga sang madamo nga responsibilidad sa paghandle sang blessings nga nabaton.
Suno kay Subong, ispiritwal man ukon indi, tanan nga tawo ang nagakabuhi nga may human vessels nga naga-eksperyensya sang stress kag indi sa tanan nga tion makabato ang isa ka indibidwal sa extreme ukon malala nga mga sitwasyon.
Ini ang rason suno sa counselor nga nagakadapat mangin tampad ang isa ka indibidwal sa iya kaugalingon kun nabudlayan na kag indi magduha-duha sa pagpangayo sang bulig sa eksperto ukon mga abyan.
Sa pag-angkon sang dako nga bugay, importante suno kay Subong ang pagbalik sa routine sang iya kabuhi kag i-proseso ang kaugalingon lakip na ang attitude sa iban nga tawo.
Nagakadapat man suno sa iya nga ikabuhi ang pagpaka-mapinasalamaton indi lamang kun yara sa kadalag-an kundi mangin man sa kasubo.
Labaw sa tanan suno sa natungdan, sa tunga sang kasakuon sa pag-atendir sang grasya kag bugay nga nabaton, nagakadapat nga may yara sang ‘silent time’ ang isa ka indibidwal agud makapangamuyo kag makapasalamat sa blessings nga iya naangkon kag mabinag-binag nga indi ini bangud sa iya lang hinimuan kag sarang kundi bangud sa Diyos nga naghatag sini.
