Nagpanginbitar sa publiko ang grupo sang YouVote para sa ila patigayunon nga virtual launching sa Agosto 8, las 7:00 sang gab-i.
Ang YouVote amo ang grupo nga nagaduso sang Registration and Education Campaign kaupod ang Global Shapers Iloilo Hub, Iloilo Champions of Music Network, Youth First Initiative Philippines, Incorporated kag Sangguniang Kabataan Federation sang syudad sang Iloilo.
Sa interview sang Bombo Radyo kay Mr. John Michael Suelo, YouVote Leader, chairman sang Association of Law Students in the Philippines kag former Ginoong Pilipinas 2019, iya ginpahayag nga katuyuan sang ila kampanya nga ma-edukar ang publiko ilabi na ang mga kabataan sa ka-importansya sang pagperehistro agud makaboto para sa masunod nga eleksyon.
Suno kay Suelo, kaupod ang pila ka mga organisasyon sa syudad, luyag nila nga mapahangop sa tanan ang importansya sang pagboto sa nagakaigo nga mga lider sang pungsod bangud nakedepende sa ila ang bwas damlag sang isa kag isa.
Dugang pa niya, sa ila patigayunon nga virtual launching, magatambong man via live ang pila ka Ilongga beauties kaangay nanday Miss Universe Philippine Rabiya Mateo kag Binibining Pilipinas candidate nga si Karen Laurrie Mendoza.
Gin-agda man niya ang tanan nga i-like kag i-follow ang ila page nga YouVote agud makit-an ang iban pa nga detalye angot sa ila kampanya.
Samtang, nagapati naman ang grupo sang Iloilo Champions of Music Network nga pinaagi sa ila musika kag talento, ma-impluwensyahan man nila ang iban nga kabataan kaangay nila nga magpanguna sa pagparehistro agud nga makaboto.
Sa interview sang Bombo Radyo kay Joshua Terania, myembro sang Iloilo Champions of Music Network, isa ka rapper, singer kag songwriter, iya ginpahayag nga sa ila indi magnubo sa 45 ka myembro, nagalaom sila nga pinaagi sa ila impluwensya, mapahangop nila sa publiko ilabi na sa Ilonggo youth ang ka-importansya sang pagboto sa 2022 elections.
Nagapati ang natungdan nga yara sa mga palad sang kabataan ang bwas damlag sang masunod nga henerasyon rason nga sa palaabuton nga eleksyon, importante nga makaboto ang tanan sang mga lider nga makabulig batak sang pungsod.
