Tuman ka disbentaha para sa pigado nga mga pungsod ang ginahimo sang manggaranon nga mga pungsod nga nagaplano sa paghatag sang booster shots sang COVID-19 vaccine sa ila pumuluyo.
Nahibaluan nga bangud sa bag-o nga mga variant sang COVID-19, may nagagwa nga huring-huring nga matapos ang anom ka bulan, maganubo na ang efficacy rate sang vaccines nga gina-administer subong rason nga nag-offer na sang booster shots ukon extra nga bakuna ang pila ka mga manggaranon nga pungsod para sa ila pumuluyo nga na fully-vaccinate na batok sa virus.
Sa interview sang Bombo Radyo kay Dr. Philip Ian Padilla, vice chancellor for academic affairs sang University of the Philippines (UP) Visayas, iya ginpahayag nga wala pa sang data nga nagapamatuod nga matapos ang anom ka bulan, manubo na ang efficacy rate ukon ang ka-epektibo sang COVID-19 vaccines.
Suno kay Padilla, mangin ang World Health Organization (WHO) ang nagapamatok mismo sa tikang sang pila ka manggaranon nga pungsod nga nagahingalit sa pagbakal sang booster shots sa baylo nga padasigon ang pagdonar sang bakuna para sa mga pungsod nga nagahulat sa gihapon nga ma-proteheran batok sa COVID-19.
Suno kay Padilla, nagakadapat nga paminsaron sang most industrialized countries nga indi lang problema sang isa ka pungsod ang COVID-19 pandemic kundi sang bilog nga kalibutan.
Nagapati man ang public health expert nga nagakadapat ibutang man sa prayoridad sang mga manggaranon nga pungsod ang mga indibidwal nga wala gid may nabaton nga bakuna kag indi lamang pagpaminsaron ang kaugalingon nga pumuluyo.
