Duha ka mga hampang gikan sa delegasyon sang Pilipinas ang balantayan subong nga adlaw sa Tokyo 2020 Olympics, the Greatest Show on Earth!
Pasado 10:00 subong nga aga, magahampang ang Filipino-American nga si Kristina Marie Knott sa Women’s 200 meter-Heat sa Athletics.
Pasado ‘las singko karon sa hapon, magahampang man si Carlos Edriel Yulo sa Men’s Vault Finals sa Gymnastics.
REDEMPTION
Subong nga finals na sang men’s vault sa gymnastics, tinguhaan ni Yulo nga ma-redeem ang iya kaugalingon matapos ang iya ginakabig disappointing nga performance sa floor exercise sang nagligad nga semana.
Matandaan nga naka-score si Yulo sang 14.733 points kag nagpang-anum sa vault sang nagligad nga hampang rason nga nakasulod siya sa Top Eight kag nakaabanse sa Finals.
Apang nangluya si Yulo bangud ika-44 lang siya out of 64 ka mga tagpalasakop sa floor exercise event.
Kun matandaan, sa floor exercise event nag-champion si Yulo sang 2019.
Nangin pigado man ang performance ni Yulo sa rings, parallel bars, horizontal bar, kag pommel horse sang nagligad nga semana apang subong nga finals, nagalaum ang Team Pilipinas kag ang Gymnastics Association of the Philippines nga mas relaxed na nga Yulo ang makit-an sang publiko.
YOUNG CAREER
Target naman ni Kristina Knott nga ma-break ang 23 seconds sa iya pag-compete sa women’s 200 meters heats of athletics subong nga adlaw.
Heat 7 ukon sa final heat natupa si Knott.
Si Knott ang nagtiglawas sa Pilipinas sa 2019 Southeast Asian Games.
Sa 200-meter event, gin-set niya ang Philippine national record set paagi sa pagdalagan sang may kadasigon nga 23.07 seconds.
Ginlapawan niya ang iya kaugalingon nga rekord paagi sa pagtapos sang hampang sa 23.01 seconds sa final nga amo ang rason kun ngaa gold medalist siya sa women’s 200 meters event.
Apang ini nga rekord ang indi pa gihapon makalagas sa Olympic qualifying time nga 22.8 seconds.
Si Knott ang nakadaug man sang gold medal sa 4×100-meter mixed relay event kag duha ka silver medals sa women’s 100-meter sprint kag 4×100-meter relay.
