ILOILO CITY- Nagapati ang Commission on Human Rights nga mahimo magconstitute sa diskriminasyon ang desisyon sang Iloilo City Government nga pagdumili sa mga indi fully vaccinated nga pumuluyo nga makasulod kag magtransact sa city hall.
Sa interview sang Bombo Radyo kay Atty. Jonnie Dabuco, Regional Director sang CHR-6, iya ginpahayag nga makabig ini nga diskriminasyon sa tion nga madalukan ang ini nga mga pumuluyo sang ila kinamatarong nga ma-avail ang serbisyo sang gobyerno.
Suno kay Dabuco, mas maayo nga magplastar sang sistema ukon mekanismo ang syudad nga maka-avail sa gihapon sang serbisyo ang mga tawo nga indi vaccinated nga indi na nila kinahanglan pa magpadulong sa city hall agud mag-transact.
Pahayag pa sang regional director nga isa man ka kamatuoran nga dapat talupangdon sang syudad amo nga indi man tanan nga pumuluyo ang may yara sang access sa bakuna.
Nahibaluan nga ang isa ka semana nga No Vaccine, No Entry Policy sa City Hall ang nagsugod subong nga adlaw.
