Magahingyo ang alkalde sang syudad sa Sangguniang Panlungsod nga magpatuman sang moratorium sa penalty sa mga pumuluyo nga indi makapatigayon sang transaksyon sa Iloilo City Hall bangud indi sila fully-vaccinated.
Matandaan nga sa sulod sang isa ka semana, umpisa subong nga adlaw, Agosto 2, ang mga fully vaccinated individuals lamang ang ginapahanugutan nga makasulod sa city hall kasunod sang pamahog nga dala sang Delta COVID-19 variant nga nakasulod na sa syudad.
Sa interview sang Bombo Radyo kay Iloilo City Mayor Jerry Treñas, iya ginpahayag nga mahimo nga makig-angot sa iya mismo ang mga indibidwal nga magakuha sang mga urgent documents kaangay sang death certificate.
Ginpat-od niya nga siya mismo ang ma-facilitate sini.
Samtang, ginpa-work from home naman ang mga empleyado sang Iloilo City Hall nga indi pa fully vaccinated.
