Ginpa-Bombo sang pila ka mga police personnel sang Banate Municipal Police Station ang Governor Niel D. Tupas, Sr. District Hospital sa Barotac Viejo, Iloilo.
Ini matapos nagpadulong kag nagpangayo sang bulig sa nasambit nga police station ang isa ka duguon nga lalaki nga ginapahayag biktima sang pagpang-kastigo.
Sa interview sang Bombo Radyo kay Police Lt. Randy Lambungan, hepe sang Banate Municipal Police Station, iya ginpahayag nga gilayon nga gindala sang ila imbestigador ang lalaki sa Governor Niel D. Tupas, Sr. District Hospital apang nagpamalibad ang pila ka mga staff kag nurse nga atendiron ang pasyente.
Suno kay Lambungan, ginrason sang attending nurse nga may yara sila sang ginasunod nga protocol kag wala sila nagabaton sang walk-in patients.
Pahayag niya, makapila ka beses pa naghingyo ang ila imbestigador nga bisan dapatan lang sang first aid ang lalaki apang wala sa gihapon gin-atender ang pasyente.
Samtang, nagpa-blotter ang attending nurse sang Governor Niel D. Tupas, Sr. District Hospital sa Barotac Viejo, Iloilo nga amo ang nakabais sang imbestigador sang Banate Municipal Police Station.
Sa interview sang Bombo Radyo kay Police Major Kenn Albert Lepsia, hepe sang Barotac Viejo Municipal Police Station, iya ginpahayag nga nagpaathag sa ila ang wala ginpangalanan nga nurse sang nasambit nga ospital.
Suno kay Lepsia, santo sa panaysayon sang nurse, istrikto nga ginasunod lang nila ang protocol sang ila ospital.
Nahibuluan nga naglapta sa social media ang video sa diin nakuhaan ang pagbayluhanay sang sabat sang amo nga nurse kag sang imbestigador sang Banate Municipal Police Station.
Bukas naman ang Bombo Radyo para sa pagpaathag sang Governor Niel D. Tupas, Sr. District Hospital.
