Wala napunggan sang imbestigador sang Banate Municipal Police Station nga taguon na lang ang iya kadismaya matapos wala gid ginpamatian sang pila ka staff kag nurse sang Governor Niel D. Tupas, Sr. District Hospital sa Barotac Viejo, Iloilo ang iya hingyo nga dapatan man lang sang first aid ang lalaki nga ila gindala nga kumpirmado biktima sang mauling incident ukon pagpangkastigo.
Sa interview sang Bombo Radyo kay Police Master Sergeant Hizron Baterbonia, imbestigador sang nasambit nga police station, iya ginpahayag nga naghuyhuy man ang iya abaga matapos nagpamalibad pa ang mga attending nurse nga nga atendiron ang duguon nga lalaki nga nagareklamo na nga nagasakit ang iya tangkugo bangud sa patal nga pilas nga naangkon sa ulo.
Suno kay Baterbonia, wala man sila naglaom nga wala nagabaton sang walk-in patients ang amo nga Government Hospital bangud diri man sila nagadala sang mga pasyente sandig sa ila standard operating procedure kun may yara sang wounded persons nga nagapangayo sa ila sang tabang.
Apang kadungan sang iya paghingyo nga unahon anay ang kabuhi sang pasyente, nagapamalibad man ang attending nurse nga may yara sila sang protocol nga ginasunod sa diin indi sila makabaton sang walk-in patients kag wala man sang may makapirma sang iga-isyu nga medical certificate bangud contractual ang on-duty nila nga doktor sang amo nga tion.
Pahayag sang imbestigador, apisar naglain ang buot niya, wala sila sang may nahimo kundi isaylo na lamang sa Don Jose S. Monfort Medical Center Extension Hospital sa Barotac Nuevo, Iloilo ang pasyente.
‘WALA GID NA PULOS ANG BASULAY’
Samtang, nagapati ang pamunuan sang Iloilo Police Provincial Office (IPPO) nga wala na sang punto pa ang pagtudlo-anay kun sin-o ang may sala sa insidente.
Sa interview sang Bombo Radyo kay IPPO Director Police Colonel Gilbert Gorero, iya ginpahayag nga matuod nga ginatungdan lamang sang mga pulis ang ila nga trabaho kag amo man ang katapo sang Governor Niel D. Tupas, Sr. District Hospital.
Apang nagapati ang IPPO director nga ang kabuhi sang isa ka indibidwal ang nagakadapat unahon sa tanan nga tinion.
Apisar sini, nagapangabay si Gorero nga kuntani sa masunod, may proper coordination na nga matabo kag nagakadapat nga mangin leksyon ini sa mga pulis kag medical officers nga lunsay frontliners agud indi na maliwat pa ang problema.
