Nag-igrab liwat ang paglaum sang mga Pinoy nga madugangan pa gid ang Olympic gold medal sang Pilipinas.
Ginabantayan subong ang gold medal match ukon final na nga hampang sa men’s flyweight sa boxing kun sa diin sulod ang pambato sang Pilipinas, ang 23 anyos nga si Carlo Paalam sang Cagayan de Oro City.
Sa men’s flyweight semi-finals, ginpierde ni Paalam ang iya Japanese nga kasumpong nga si Ryomei Tanaka paagi sa unanimous decision sang mga judge.
Atubangon ni Paalam sa finals si Galal Yafai sang Great Britain.
Si Paalam ang ikaapat nga Filipino boxer nga nakalab-ot sa Olympic finals sunod kanday Anthony Villanueva, Mansueto “Onyok” Velasco kag silver medalist Nesthy Petecio.
Target subong sang nasambit nga Filipino boxer nga malab-ot ang gold medal achievement sang weightlifter nga si Hidilyn Diaz.
Sa subong, may mga viral clips sa post-bout moments ni Paalam kay Tanaka kun sa diin gindayaw sang publiko ang sportsmanship kag affection sang Pinoy boxer sa iya nga kasumpong.
Sa video, nakit-an si Paalam nga ginhatagan sang forehead kiss ang iya nga kasumpong matapos gin-anunsyo nga siya ang nagdaug sa semi finals.#
