Sa tunga sang COVID-19 pandemic, may isa ka grupo nga nagpadayon sa paglab-ot sa mga kubos nga komunidad kadungan sang ila nga pagbyahe agud ma-promote ang beauty and wonders sang Panay.
Sa interview sang Bombo Radyo kay Ross Loyola Jucaban, leader sang Traveller of the Philippines -Team Visayas, iya ginpahayag nga lima tubtob anom na ka-tuig ang ila nga grupo sa diin kadam-an sa ila nga mga myembro ang lunsay young professionals.
Suno kay Jacuban, katuyuan sang ila grupo nga malibot ang mga tourist spots sa Visayas agud ma-promote ini indi lamang sa mga foreign nationals kundi mismo sa byahero man nga mga Filipino.
Apang sa ila nga paglab-ot sa mga bukid, natukiban sang grupo ang mga kubos kag nagakinahanglan nga pumuluyo rason nga na-desisyunan nila nga magpatigayon sang pila ka mga outreach program.
Naga-outsourcing man sang pondo ang grupo nagikan sa pila ka mga dalagko nga kompaniya kag sa ginapatigayon nga mga aktibidad kaangay sang hike for a cause.
Ginapasiguro man sang grupo nga may pahanugot sila sa kada local government unit antes magpatigayon sang outreach program sa kada lugar nga ginakadtuan.
