Wala sang may gindagdag nga penalidad ang COVID-19 Team sang Iloilo City Government sa isa ka Business process outsourcing (BPO) company sa Mandurriao, Iloilo City.
Ini ang kasunod sang pagpa-Bombo sang isa ka empleyado sa iya Team Leader sa amo nga kompaniya matapos nalatnan siya sang COVID-19 sang iya kaupod sa trabaho nga ginapahayag una na nagreklamo nga may sintomas sang virus apang ginpa-duty sa gihapon sang ila lider.
Sa interview sang Bombo Radyo kay Mr. Jeck Conlu, spokesperson sang COVID-19 Team sang Iloilo City Government, iya ginpahayag nga wala sang direct evidence nga may ginlapas nga protocol ang amo nga kompaniya.
Apang suno kay Conlu, padayon ang ila monitoring sa amo nga kompaniya sa diin kadam-an sa mga nalatnan sang virus ang nakarekober na subong.
Pahayag niya, nagapatigayon man sila sang random checking sa tanan nga mga BPO company sa syudad agud ma-monitor ang sitwasyon lakip na ang kondisyon sang mga empleyado.
