Ini maangot sang mga otoridad ang pila ka komosyon nga natabo nga ginkaulamiran sang mga biktima antes ang shooting incident sa Zone 3 Barangay Ticud, La Paz, Iloilo City.
Matandaan nga patay sa insidente sanday Earl Jonathan Gatin, 18, residente sang nasambit nga barangay kag Albert Llupar, 18, residente sang Brgy. North Baluarte, Molo, Iloilo City.
Samtang pilason naman si Renz Anthony Mahusay, 18, sang Brgy. Ticud, La Paz.
Sa interview sang Bombo Radyo kay Police Major Jose Val Ladublan, hepe sang La Paz Police Station, iya ginpahayag nga santo sa ila pagpanalawsaw sa pila ka mga indibidwal nga naangot sa pila ka komosyon sa sulod lang sang isa ka adlaw antes natabo ang pagpangluthang-patay, pat-od nga na-settle ang mga kinagamo.
Suno kay Ladublan, ginalantaw nila ang posibilidad nga may nakaaway pa ang mga biktima kag may nagdumot sa ila.
Sa subong, nagapadayon pa ang imbestigasyon sang La Paz Police Station agud matul-id ang suspek sa likod sang shooting incident.
