ILOILO CITY- Ginkalipay sang barangay officials sang Aguinaldo, La Paz, Iloilo City nga isa ang ila barangay nga una nga na-release-an sang cash aid halin sa Assistance for Individuals in Crisis Situation (AICS) sang Department of Social Welfare and Development (DSWD).
Sa interview sang Bombo Radyo sa Punong Barangay Oscar Guarin, iya ginpahayag nga nakadepende gid sa pagpanginuha sang opisyal sang barangay ang kadasigon sang pag-release sang ayuda.
Nahibaluan nga ang Barangay Aguinaldo kag Luna pa lang ang na-release-an sang ayuda sa distrito sang Lapaz.
Samtang, subong nga adlaw lang nakapasa ang Brgy. Lopez Jaena Sur, La Paz, Iloilo City sang pinal nga listahan sang mga mangin benepisyaryo sang cash aid sang AICS.
Sa interview sang Bombo Radyo kay Punong Brgy. Johnny Lego, iya ginpahayag nga makapila ka beses naman sila nga nagpasa sang listahan apang ginpabalik sang City Social Welfare and Development Office (CSWDO) bangod nga may mga errors kag discrepancies.
Suno kay Lego, mas gin-ididan sang mga kagawad sang barangay ang pinal nga listahan agud nga mangin tayuyon na ang pagrelease sang cash aid para sa mga pumuluyo sang barangay.
