ILOILO CITY – Gingulgulan ang liog, ginbuno ang dughan kag ginbutangan sang packing tape ang tiil sang ginapahayag myembro sang LGBTQ community matapos ginaalegar wala nagbayad sa duha ka mga suspek matapos ang ila nga “one night stand.”
Natabo ang krimen sa Barangay Nabitasan, La Paz, Iloilo City kun sa diin temporaryo nga nagatinir ang biktima kaupod ang iya ginatatap nga mga layaw nga ido.
Patay ang biktima nga si Johnny Tan, 59, residente sang Yulo Arroyo, Iloilo City Proper.
Lunsay naman napreso ang magpakaisa nga suspek nga sanday John Paul Dubria, 20, kag Tammy Banesio, 18, mga residente sang Valderama, Antique.
Sa interview sang Bombo Radyo kay Dubria, suspek nga una nga nadakpan, iya ginpahayag nga sang ginsukot niya si Tan kag wala ini nagbayad, nagpauli pa siya sa iya boarding house kag nagkuha sang kutsilyo.
Suno kay Dubria, tuyo lang niya kuntani nga pahugon si Tan bangud kinahanglan gid niya kag sang iya pakaisa ang kwarta agud makapauli sa Antique apang ginapahayag nga may yara man sang kutsilyo ang biktima kag nagsiling nga mapatyanay na lamang sila.
Pahayag ni Dubria, ginsiko siya sang biktima kag naghana nga magbuno rason nga gin-unahan na lang niya ini pinaagi sa pag-gulgol sang liog.
‘MAAYO NGA TAWO’
Baliskad sa pahayag sang mga suspek nga wala nagbayad ang biktima nga si Tan pagkatapos sang gina-alegar one night stand, nagdepensa naman ang mga barangay officials nga maayo nga tawo kag may disente nga background ang biktima.
Sa interview sang Bombo Radyo kay Nabitasan Punong Barangay Barbara Arroza, iya ginpahayag nga nag-abot si Tan sa ila nga barangay nga ‘professional, edukado, kag halin sa prominente nga pamilya.’
Kun sa hulag ang basehan, ‘maluming’ si Tan suno kay Arroza apang indi makumpirma kun miyembro ini sang LGBT Community.
Kilala ni Arroza si Tan bangud 2018 ini nagpadulong sa ila nga barangay bangud may adbokasiya ini nga nagabulig sa mga layaw nga ido.
Suno kay Arroza, ginapanag-iyahan sang utod ni Tan ang isa ka lote sa amo nga barangay bangud ginatipunan ini sang layaw nga mga ido antes ipa-adoptar ini nga mga sapat sa iban nga mga tawo.
Antes natabo ang krimen kagab-i,wala gid sang gamo nga narekord sa barangay nga naangot sa pangalan sang biktima.
MGA SUSPEK
Ginpahayag man ni Arroza nga nakit-an man sang iban nga mga pumuluyo ang mga suspek nga nagatambay-tambay sa lugar sang biktima kun kaisa.
Suno kay Arroza, may naga-mensyonar man nga isa pa lang ka bulan nga nagatinir sa amo nga lugar ang mga suspek
May nagapahayag man nga mabuot man ang mga suspek kag wala sang gamo bangud lunsay mga hipuson.
Ginapahayag nakatrabaho man ang mga ini sa karinderya sa Lapaz, nakatrabaho man sa tindahan, kag sang ulihi, nag-obra pa gid sa balaligyaan sang itlog.
IMBESTIGASYON
Padayon naman ang imbestigasyon sang mga pulis kun ano gid ang matuod nga rason sa pagpatay sang mga suspek sa biktima nga si Tan.
Sa interview sang Bombo Radyo kay Police Staff Sergeant Antonio Santibañez, imbestigador sang Lapaz Police Station, iya ginpahayag nga apisar nag-ako na ang mga suspek sa amo nga krimen, indi pa subong matumod kun husto ang ila pahayag nga sa one night stand nag-ugat ang insidente.
Suno kay Santibañez, may lagsanay pa nga natabo kagab-i kag wala man napunggan sang pila ka residente nga kastiguhon si Banesio nga amo ang ulihi nga nadakpan.
Ang suspek nga si Dubria ang una nga nadakpan sang mga pulis pila ka minutos lang matapos ginbuno ang 59 anyos nga biktima.
Sa subong handa ang pamilya nga magpasaka sang kaso-kriminal batok sa mga suspek. ###
