Pila ka tuig na lang kuntani ang ginahulat kag mangin isa na ka pulis ang 20 anyos nga si John Paul Dubria. Sang Hulyo 16, nag-aplay ini sa isa ka unibersidad sa Antique agud nga mag-eskwela sa criminology. Apang kagab-i, pasado ‘las sais sa gab-i, lain ang natabo. Isa siya sa mga nagpatay sa isa ka 59 anyos nga lalaki sa Barangay Nabitasan, Lapaz, Iloilo City bangud gina-alegar wala nagbayad ang biktima sa ila nga ‘one night stand’.
Kaupod ni John Paul nga nakahunong sa presuhan sa Lapaz amo ang iya pakaisa nga si Tammy Banesio, 18. Lunsay sila mga residente sang Valderama, Antique.
Sa exclusive interview sang Bombo Radyo sa iloy nga si Jocelyn, iya ginpahayag nga ika-duha sa ila pito nga kabataan si John Paul. ‘Hipuson kag mabuot’ si John Paul suno sa iloy.
Sang Enero subong nga tuig, nagpadulong ini sa Iloilo agud kuntani magtrabaho sa manokan sa banwa sang Zarraga. Wala ini natigayon sa amo nga obra; kag kaupod si Tammy, nagtrabaho na lang si John Paul sa balaligyaan sang itlog sa Lapaz market.
Ginpahayag ni Jocelyn nga nagapadala pa si John Paul sa ila nga balay agud nga may gastuhon ang iya amay kag iloy amo man ang iya mga kauturan.
Palangitan-an sang ila pamilya ang pagbaligya sang mga basket apang bangud sang istrikto nga mga pagsulundan sa tunga sang ginapatuman nga lockdowns, naga-untat-untat ang trabaho sang pamilya ni John Paul.
Suno pa kay Jocelyn, amo ini ang rason nga nagpasugot siya nga magtrabaho lang anay si John Paul diri sa Iloilo agud nga makabulig man sa pagsustiner sa ila nga pamilya.
Halin sang Enero tubtub kagab-i suno sa iloy, wala gid nakapanugid si John Paul nga may problema ini sa ilabi na sa kwarta.
Sang napahibalo sa pamilya ang natabo nga nakahimo sang krimen si John Paul, husto na lang nga maghibi ang iloy sa nadangatan sang iya nga anak.
‘PASAYLUHA MAN SI JOHN PAUL’
Wala pa nakaabot sa Iloilo ang pamilya bangud magluwas nga ginakulang sa pamasahe, wala pa naka-secure sang travel pass.
Suno kay Jocelyn, batunon nila kun pasakaan sang kaso si John Paul apang kuntani ‘indi lang pagpatam-an ang iya nga anak.’
“Pakitluoy ako kananda nga indi pagpatam-an ang bata ko. Mangayo ako pasaylo sa natungdan nga nasal-an sang bata ko. Tam-an kami ka pigado, wala kami sarang nga mahimo. Kun indi kami kalibot, indi kami kakaon. Amo da gani nga napiritan ako nga pasugtan ya bata ko nga paobrahon [sa Iloilo] kay siling ko makabulig-bulig man tana [sa amon pamilya.]”
KRIMEN
Kun balik-balikan ang natabo kagab-i, gin-gulgul nanday John Paul kag Tammy ang liog sang biktima nga si Johnny Tan, ginbuno ang dughan kag ginbutangan sang packing tape ang tiil sini bangud gin-alegar wala nagbayad matapos ang ila nga “one night stand.”
P1,500 kuntani pahayag nanday John Paul ang bayad sa ila apang wala nagtuman ang biktima rason sang pagbinaisay, pahugay, kag naglab-ot sa patyanay.
Padayon naman ang imbestigasyon sang mga pulis angot sa amo nga insidente. ##
