Nagdangat sa 11 ang kaso sang Dengue Hemorrhagic Fever nga narekord sa Barangay Calaparan, Arevalo, Iloilo City.
Sa interview sang Bombo Radyo kay Barangay Kagawad Antonio Ituriaga, iya ginpahayag nga kalabanan sa natapikan sang nasambit nga balatian ang lunsay kabataan nga naga-edad 10 ka-tuig pataas.
Suno kay Ituriaga, bangod tig-ululan na, nagadamo man ang lamok sa ila lugar.
Bangud sini suno sa opisyal, magapatigayon sila sang asud-asud nga clean-up drive sa diin plano man nga ibalik ang 3 O’Clock Habit ukon ang ila regular nga pagpanglimpyo sa barangay kada hapon.
Pahayag niya, ginapasangkad man ang information dissemination sa barangay angot sa kun paano malikawan ang balatian nga dala sang mga lamok.
