Nagawangal ang pila ka mga pumuluyo sa Barangay Oñate de Leon, Mandurriao, Iloilo City bangud sa guba nga drainage system sang lugar.
Sa interview sang Bombo Radyo kay Mary Jane Regalado, residente sang nasambit nga lugar, iya ginpahayag nga kun magbubo ang mamunog nga ulan, tuman ka apektado ang ila kita sa karenderya bangud sa mataas nga tubig baha.
Suno sa iya, may bes nga padayon lang ang pagsaka sang tubig-baha sa ila lugar rason nga nagapanirado na lang sila agud ipaiway ang negosyo.
Dugang pa niya, madugay na ini nga problema sa ila lugar apang wala sa gihapon sang solusyon.
‘PALPAK NGA PAG-OBRA SANG DRAINAGE’
Ginkadismaya man sang barangay officials sang Oñate de Leon, Mandurriao, Iloilo City ang ginapahayag ‘palpak’ nga pag-obra sang ila drainage nga ginatunaan sang madamo nga problema sa tion nga magbubo ang ulan.
Sa interview sang Bombo Radyo kay Punong Barangay Willie Colon, iya ginpahayag nga umpisa sang pagpungko niya bilang pinuno sang barangay, dako na nga problema ang ila nga drainage system.
Masobra 10 ka-tuig na nga guba suno sa opisyal ang ila nga drainage sa diin tuman kadugay ang paghubas sang tubig-baha.
Pahayag niya, kuntani hatagan na ini sang igtalupangod sang gobyerno.
